Logoja Kombëtare e 80-Vjetorit të Çlirimit të Shqipërisë mban autorësinë e Ejona Karkinit
• Logoja që përmban elementët patriotikë kombëtarë u vlerësua nga komisionet respektive si përfaqësimi më dinjitoz i imazhit të vitit mbarëkombëtar të 80-Vjetorit të Çlirimit të Shqipërisë
Memoriali ikonë “Nëna Shqipëri”, është Logoja Kombëtare e 80 vjetorit të Çlirimit të Shqipërisë e pëzgjedhur fillimisht nga një komisioni i posaçëm i ngritur pranë Ministrisë së Ekonomisë, Kulturës dhe Inovacionit ku mes shumë propozimeve të dorëzuara nga të rinj të interesuar për të kaluar më pas në fazën përzgjedhëse dhe dakordësisë në Komisionin Shtetëror të drejtuar nga Ministri i Mbrojtjes Niko Peleshi.
Logoja Kombëtare e 80-Vjetorit të Çlirimit të Shqipërisë që mban autorësinë e Ejona Karkinit, do të jetë simbolikë përfaqësuese dhe do të shoqërojë evenimentet zyrtare dhe shkresat protokollare të Institucioneve Qendrore Shtetërore, si pjesë identifikuese e festimeve dhe si imazh gjatë zhvillimit të aktiviteteve në 2024, shpallur si viti mbarëkombëtar i 80-Vjetorit të Çlirimit të Shqipërisë me vendim të Këshillit të Ministrave datë 17.01.2024. Logoja Kombëtare 80- Vjetorit të Çlirimit të Shqipërisë përmban elementët patriotikë kombëtarë dhe u vlerësuar nga komisionet respektive si përfaqësimi më dinjitoz i imazhit të vitit Mbarëkombëtar i 80-Vjetorit të Çlirimit të Shqipërisë.
Autorja 26-vjeçare Ejona Karkini, ish-studente e arkitekturës e njëkohësisht bashkëthemeluese e një startup-i në fushën e dizaijnit dhe marketingut, shpjegon se “Logoja Kombëtare 80 vjetorit të Çlirimit të Shqipërisë përmban Monumentin Nëna Shqipëri, nëpërmjet se cilës u mundova të përcjell lirinë që fal figura e saj me elementë si veshja që valëvitet, që në këtë rast mban në dorë flamurin shqiptar, ndryshe nga skulptura ku ajo ka gjethe dafine dhe një yll. Ashtu si flamuri merr prezencë skenike kur valëvitet nga era, ideja e shiritit që formon 80-en e viteve që gëzojmë si të çliruar, ndjesia që të jep pavarësia”
Të rinj, artistë dhe krijues në fushën e arteve pamore, iu përgjigjën ftesës së Ministrisë së Ekonomisë, Kulturës dhe Inovacionit për të dhënë kontributin e tyre artistik në konkursin e organizuar me këtë rast, ku konkuruan denjësisht 64 projekte që plotësonin të gjitha kriteret si punime origjinale, të papublikuara më parë, individuale dhe punë të realizuara në grup.
Të gjitha autoritetet publike në vend do të kenë në shkresa këtë logo
Logoja zyrtare e 80-vjetorit të çlirimit të atdheut përmban simbolin e monumentit “Nënë Shqipëri”, vepër e vitit 1971, realizuar nga skulptorët Kristaq Rama, Mumtaz Dhrami dhe Shaban Hadëri. Imazhi i logos u prezantua më 29 Prill pranë Drejtorisë së Përgjithshme të Arkivave. Të gjitha autoritetet publike në vend do të kenë në shkresa këtë logo deri në përfundim të vitit.
80-vjetori i çlirimit të Shqipërisë është miratuar si vit jubilar mbarëkombëtar nga Këshilli i Ministrave. Logoja e 80-vjetorit të çlirimit është miratuar nga Komisioni Shtetëror i 80-vjetorit, pas një konkursi të hapur të zhvilluar nga Ministria e Ekonomisë, Kulturës dhe Inovacionit. Ejona Karkini u përzgjodh si fituesja e konkursit për logon kombëtare të 80-vjetorit të çlirimit mes 64 aplikantëve. Por prej ditës së hënë (30 prill 2024) sipas DPA-së të gjitha autoritetet publike të Republikës së Shqipërisë, duhet të përdorin shkresat zyrtare me logon e 80-vjetorit të çlirimit. “Modelet e reja të shkresave zyrtare janë miratuar me vendim të Këshillit të Lartë të Arkivave (KLA), dhe përveçse në Fletoren Zyrtare, mund të gjenden edhe në faqen arkiva.gov.al”, thuhet nga DPA. Drejtoria e Përgjithshme e Arkivave shprehet se ky vit shërben për të përkujtuar një përvjetor të rëndësishëm të përfundimit të betejës së shqiptarëve për çlirimin nga pushtimi nazist dhe fashist, si një përkujtesë e detyrës qytetare të çdo shtetasi shqiptar për të mbrojtur atdheun kur ai është në rrezik. “Institucionet shtetërore janë të detyruara ta përçojnë këtë mesazh, përmes logos së miratuar, në çdo shkresë zyrtare, deri në fund të vitit 2024. Kujtojmë, se mospërdorimi i modeleve të njësuara të shkresave zyrtare nga cilido autoritet publik, shoqërohet nga ndëshkime administrative të përcaktuara në “Ligjin për Arkivat””, thuhet nga DPA.
Fituesja e konkursit
Në profesion arkitekte, e apasionuar pas dizajnit dhe natyrës, Ejona Karkini na njeh me idenë që frymëzoi krijimin e logos, e cila do jetë pjesë e festimeve zyrtare të sivjetshme në nder të 80-vjetorit të çlirimit të atdheut. Në videon e publikuar nga Ministria e Ekonomisë, Kulturës dhe Inovacionit, 26-vjeçarja Karkini, ish-studente e Arkitekturës shpjegon se ideja për logon erdhi natyrshëm, duke qenë se ky vit shënon edhe 80-vjetorin e çlirimit të Shqipërisë. “Simboli i këtij eventi është monumenti “Nënë Shqipëri” realizuar nga skulptorët e njohur Kristaq Rama, Mumtaz Dhrami dhe Shaban Hadëri. Flamuri merr prezencë skenike kur valëvitet nga era dhe prej këtij imazhi erdhi edhe ideja e shiritit që formon 80-ën e viteve që gëzojmë ne si të çliruar, ndjesia që të jep pavarësia”, shprehet Karkini ndër të tjera. Artistë dhe krijues në fushën e arteve pamore, iu përgjigjën ftesës së Ministrisë së Ekonomisë, Kulturës dhe Inovacionit për të dhënë kontributin e tyre në konkursin e organizuar me këtë rast.